يوميات موظف عقاري

يوميات موظف عقاري

المسوق العقاري : في عين بعض الناس هو ذلك الشخص ذو المئة كلمة ورأي وحلانجي بيلعب بالبيضة والحجر وفي عين البعض الاخر هو شخص يريد المساعدة مقابل مبلغ مادي زهيد مقابل الجهد اللي بيعملو ولكن في الحقيقة بقي ان المسوق العقاري من وجهة نظري المتواضعة هو ذلك الشخص اللي بيطلع عينه في تقريب وجهات النظر بين البائع والمشتري وازالة كل العقبات وتزليل الصعاب بين الطرفين وايضا هو ذلك الشخص الذي عندما يبيع عقار ما بيكون قد صرف الكثير من ماله وجهده وتركيزه بما يعادل ثمن العمولة الذي سيحصل عليها عند اتمام البيعة وجهة نظري قد تكون خطأ ولكنها الحقيقة .

وعلشان مطولش عليكو يااصدقائي الاعزاء يالا بينا نتكلم عن يومياتي انا صديقكم الفقير الي الله وارجو عدم مضايقتكم بالكلام عني ولكني اوعدكم انني ساختصر ,, الاسم : احمد , المهنة : المفروض اكون مدير مبيعات عقارية في نظر الناس وفي القوام الاداري للشركة التي اعمل بها ولكني في الحقيقة بعتز بلقب ( وسيط عقاري ) او ( سمسار ) .

اعمل في هذا المجال من 2007 تقريبا وحتي الان حيث احدثكم ونحن في سنة 2014 يعني تقريبا 7 سنوات ولكني بالطبع عملت في مجالات كثيرة جدا من قبل العمل في التسويق العقاري ,, سواء بيع وتسويق او اي مجال اخر ,, ندخل علي المهم – اعمل في شركة جميلة جدا وحديثة النشأة هي في الاساس شركة مقاولات ولكنها ايضا استثمار عقاري وتسويق الحمد لله محبوب من زمايلي في العمل وانا كمان بحبهم جدا ويوجد لدينا هذا الشئ الذي يسمي روح الفريق هههههههههههه ..

رئيس مجلس ادارة الشركة ومالكها رجل عملي جدا – صارم – عصبي ولكنه انسان محترم في المجمل اسلوب شركتنا له طابع خاص لانها كما قلت لكم تعمل في قطاعات عديدة .. فيوجد لدينا قسم المقاولات – الحسابات – المبيعات – التسويق – السكرتارية – واخير عمال البوفيه وبحكم شغلي بكون انا المسئول عن قسم المبيعات والتسويق بشكل عام مع صديق اخر يعني من الاخر كدا احنا الاتنين بتوع كله ههههه سواء بنبيع حاجتنا او حاجة الغير من عمارات – شقق – اراضي – مصانع – مزارع .. الخ

شغلنا بينقسم مابين اتصالات ومتابعات وشغل ميداني ومعاينات وما ادراك ماهي المعاينات ؟؟؟؟!!!

طبعا زي ماحضراتكم عارفين ان المعاينات دي هي ان سيلز من المبيعات يفرج العميل علي الشقة او العقار المنشود (( اي المراد بيعه ))

وطبعا دا المفروض بيتم مقابل مبلغ مادي صغير يسمي رسم المعاينة بيبقي 50 او 70 جنيه في بعض الاحيان ولكننا طبعا بنرفض هذا الاسلوب  نهائيا  لاني بصراحة بحس رسم المعاينة دا زي الاعلانات اللي تقولك اشتري خلاط + مصاريف الشحن واحنا بصراحة عملائنا شركاء نجاحنا علشان كدا المعاينات عندنا مجانية ..

وبحكم شغلي اللي صدعتكم بيه هههههه قابلت ناااااس كتير جدا جدا يمكن مئات العملاء منهم طبعا اللي بيتفرج لوحده او مع اسرته او مع عروسته واهلها او مع اصدقائه ... الخ والمطلوب من كمسوق عقاري انك تتعامل مع كل عملاءك بوتيرة واحدة واسلوب محترم ووجه مشرق وبشوش وصدر رحب وسؤعة بديهة لما سوف تلاقيه من اسئلة لولبية من بعض العملاء ودا طبعا عشان انت المفوض واجهة الشركة والانسان الملم بكل الامور .. وطبعا حدث ولا حرج من العملاء وانماطهم وثقافاتهم المختلفة انت في الشغلانة دي بتقابل كل الناس وكل فئات المجنمع لانهم ببساطة هم دول شركاء نجاحك وهما من الاخر اللي بتقبض من وراهم مرتبك كل اول شهر ..

والعملاء كالاتي : عميل مثقف وفاهم ومش بيتعبك وبيجيب من الاخر , عميل متحفز واقفلك علي الوحدة , عميل هادئ وعاجبه كل حاجة , عميل فتاي وعامل بيفهم في كل حاجة لدرجة انه هو اللي بيشرحلك اد ايه الشقة دي جميلة والمناور والبروز والقبلي والبحري وبيبقي ناقص ان هو اللي يبيعلك الشقة هههههه والنوع دا من العملاء انا قابلته كتير جدا هههههه وفي طبعا ( شارلوك هولمز المهنة ) وهو بيبقي سمسار زيك بالظبط جاي يجس السوق ويشوف اسعارك ايه وكدا ,, وطريقة عمولاتك بس دا بصراحة انا بكشفه من اول مااشوفه ههههه المهنة بتحكم بقي ياجماعة .. في بقي العميل الموسوس والمتردد اللي بيبقي حاسس دايما انك هتسرقه وان اوراق العقار مش سليمةوغلط في غلط والاخ دا بيبقي اقناعه صعب نسبيا ,, في بقي العميل صاحب المزاج ( مزاجنجي ) ودا بييجي يقولك من الاول علي طلباته وانه عايز حاجة شياكة ومش مهم السعر ودا بقي اكثر العملاء راحة لي لانه بيعرف يقدر كويس ,, في بردو العميل الرغاي ههههه ودا بردو قابلني كتيير جدا بصراحة وطبعا بياكل دماغك من ساعة ماتطلع المعاينة لحد ماترجع الشركة تاني وطبعا بيحكي في كل المواضيع الا العقارات ههههههههههههه ,, ونيجي بقي للطامة الكبري وهم العملاء من الجنس الناعم ( السيدات ) كلنا عارفين ان الست بطبعها لها تطلعات وبتشوف الحاجة من منظور تاني خالص يعني مثلا ممكن توقف بيعة في شقة ممتازة وشرحة وبرحة علشان المطبخ كبير بس مش اووي او مدخل العمارة ابيض مسفر او سلالم العمارة او او فعلا بيطلعو القطط الفاطسة وناهيك بقي ياصاجبي عند اتمام البيعة والتاكد من الاوراق والفصال ثم الفصال ثم الفصال في البلغ المتفق عليه وفصالهم شديد بصراحة لدرجة ان في احيان كثيرة البيعة بتقف ولكن طبعا علي راسنا سيدات مصر كل التحية ليكو ( شاااابوه للستات )

شغلتنا بالرغم من صعوبتها الا انها ممتعة للي بيحبها وبعيدا عن اي شئ انا شخصيا ببقي سعيد جدا وانا بشتغل ايها الناس                   ( رفقا بالمسوق العقاري )                                                                         

                                                                                                                              يتبع ,,,

انتو مكتب ولا شركة ؟؟

انتو مكتب ولا شركة

سوال اتسالته مرارا وتكرارا سواء تليفونيا او اليكترونيا .. بس انا مقدر مخاوف الناس وتجاربهم المريرة والصعبة مع السماسرة وكاتب التسويق العقاري , واد ايه من وجهة نظر العميل ( المشتري ) ان السمسار دا واحد كل همه الفلوس وممكن يعمل اي شئ ويبيع اي بيعة علشان ياخد العملة ,, وان العميل في نظر السمسار ماهو الا تلك الشوال الملئ بالاموال .

طيب ايه رايكو ؟؟ ماتيجو معايا كدا نتعرف علي شكل وانماط وتعريف السمسار وشركات العقارات والفرق بينهم

السمسار : هو الشخص الذي يوفق مابين البائع والمشتري وبياخد اللي فيه القسمة وبيكون غالبا من اهل المنطقة التي يوجد بها العقار المطلوب والسمسار غالبا بيكون في المجمل شخص غير مؤهل علميا في عمليات البيع والشراء والتجارة ... انما بيعتمد علي حسه الاجتماعي وعلاقاته باصحاب العقارات في منطقته وكاريزمته مع المشتري وكلامه الحلو اللي من الاخر بترضي الزبون وتخليه يشتري

ندخل بقي علي المهم مكاتب التسويق العقاري تنقسم الي اولا : صاحبنا السمسار اللي كنا بنتكلم عنه ربنا فتحها عليه وعمل شوية شغل حلوين ومسك قرشين كويسين راح مقفل اوضة في دور ارضي او بدروم وبدء يوسع نشاطه ويكبر ويطور من نفسه ويتعرف علي ملاك اكتر ومناطق اكتر وبردو تبقي الكاريزما الطاغية ..

ثانيا : شوية شباب زي الفل اجرو شقة صغيرة وعملوها مكتب تسويق عقاري وكبرو باتصالاتهم وعلاقاتهم وذكاءهم واستخدموا الوسائل الحديثة في التسويق زي مواقع التواصل الاجتماعي وغيره ... الخ وبدءو يسوقوا احياء شقق – محلات – اراضي – عمارات – وكبرو شوية فبدءو يسوقوا كومباوندات ومدن زي 6 اكتوبر – الشيخ زايد – حدائق الاهرام ... الخ وبعدين ربنا كرمهم وخدو حصة تسويقية من مشروع كبير وكل دا وهما من الاساس معندهمش حاجة وانما بيسوقوا للغير واعتمدو علي الله وكبرو نفسهم .

ثالثا : واخيرا شركات الاستثمار العقاري ودول بقي ملوك اللعبة العقارية لان ببساطة دول ناس عندهم مشاريعهم العملاقة سواء كومباوندات او عمارات او منتجعات او مولات .. الخ وبيسوقوها وبتبقي طبعا منظومة متكاملة عندهم تسويق الكتروني – مبيعات – كول سنتر – تسويق – خدمة عملاء .. الخ  ودول زي كاقلت هما ملوك اللعبة خصوصا موخرا وتهافت العملاء علي الكومباوندات الراقية حيث الراحة والجمال والامان وطبعا حط تحت الامان الف خط وطبعا المرافق و الشجر وحمامات السباحة و و و .. الخ  وكل الاوبشنز دي بتكون بتمن معقول وانظمة سداد بتوصل احيانا لاكثر من 5 سنوات وطبعا اقرر تاني الامن والامان الموجود في الكومباوندز

نيجي بقي للمهم ونصيحة اخوية للمشتري                                                                                             

 – ياريت تخلي كل تعاملاتك مع من تثق فيه خصوصا في العقارات واللي بيكون ساعات كتير عليها نزاعات ومشاكل مش هيقدر يحلهالك الا السمسار

العمولة ثم العمولة ثم العمولة لاتبخل بالعمولة علي من ساعدك وتعب معاك  ههههههه وطبعا ياريت متلفش من ورا السمسار وتروح للمالك وتتعامل معاه بعد السمسار مفرجك انت ممكن صح تشتري العقار من المالك مباشرة وتوفر عمولة بس ياصديقي السمسار اللي انتا ضحكت عليه هيعرف هيعرف وهيبقي الموقف مش لذيذ وبعدين السمسار دا هوا اللي هيبيعلك عقارك لاحقا اذا حبيت تنقل منه .

دايما اختار العقار اللي يناسب امكاناتك ويناسب المرحلة وفكر مع نفسك شوية قبل ماتدفع جنيه وقرر انت عايز العقار دا ليه هل اقامة ولا استثمار ؟؟؟ لانها هتفرق معاك كتير جدا جدا ودا عن تجربة شخصية

اتعب نفسك حبتين واتاكد من سلامة اوراق وموقف العقار القانوني وهل العقار دا عليه مشاكل ولا سليم مية % لان اللي انتا هتدفعه مش مبلغ صغير في كل الاحوال .

وان شاء الله تلاقي عقارك ومبروك مقدما

                                                                                                              ,, يتبع